قصيدة للعميد:منصور حسن العتيبي بعنوان (مبروك)

مبروك
هذه قصيدة للعميد: منصور بن حسن العتيبي

قم ياسعد عطني من المكتبة بوك
=========== هات القلم حان اختبار القياسي
في كل يوم تقول يابوي رقوك
============= لازم تذكرني بعد كنت ناسي
راسي على الصكات قاسي وأناابوك
=========== لاتحسب ان الراس ماهوبقاسي
صكه ورى صكه ولاعندي اشكوك
============= لوتكثر الصكات مالان راسي
والله ماني ياحمر العين مربوك
========== مثل الجبل وان هبت الريح راسي
الياعزمت ادعس على الجمر والشوك
=========== مدري صواكة راس ولاحماسي
ولاذكرت اهروج مفلس وصعلوك
=========== العلم واضح ليس فيه التباسي
خدمت ديني والملك قبله ملوك
====== حب الوطن في منهجي شي اساسي
والله لحارب ياوطن قوم عادوك
========== واحرم عيوني من لذيذ النعاسي
ترجمتها في حسن سيرات وسلوك
=========== فصلت ثوبي يالعتيبي مقاسي
ترى الإداره فن مع حزم محبوك
============= تحتاج رجال محنك سياسي
كسبت قوم ان جيتهم يوم سروك
============ لازمك يقضونه بدون التماسي
وتقول ليش الناس يابوي حبوك
========= قلت الذهب ماهوسوات النحاسي
ان جات وان ماجات قول الف مبروك
========== ماني من اللي يعبدون الكراسي
صحيح ماعندي ملايين في بنوك
============ مير القناعه كنزفضه وماسي